!هاي دارلينجز

اليوم وصلني عطر لشركة لاليك, اسم العطر

Rêve d’Infini

ومعنى الاسم بالعربي “حلم أبدي” , العطر متوفر في ديوتي فري جيمس ريتشردسون, وهلأ عاملين فعالية كتير نغشة ولزيزة في محل ديوتي فري بالمطار حابة احكيلكم عنها

الفعالية بتتعلق باسم العطر , يعني الحلم الابدي, وهي للمسافرين بقدروا يفوتوا على محل ديوتي فري وهناك في منطقة محددة للفعالية, في هاي المنطقة بتلاقوا مرايات قبال بعض, اذا بتتصوروا فيها بتبين الصورة “أبدية” او بلا نهاية لانه كل مراية بتعكس صورة المراية التانية, وهيك بتصير صورة جوا صورة جوا صورة, حلو صح؟؟؟

اللي بحبوا يشتركوا بالفعالية ممكن يربحو عطر للمرأة وكمان عطر للرجل من شركة لاليك! كيف بتشتركوا بالفعالية؟ بتصورو في هاي المراية اللي بمحل ديوتي فري, وبتطلعوا الصورة على الشبكات الاجتماعية (فيسبوك, انستجرام او ايش ما بدكم) وبتعملوا تاج لديوتي فري وهاشتاج للفعالية

#jr_lalique @dutyfree_il

صاحب او صاحبة الصورة “الأبدية” الأكتر اشي مبدعين راح يربحو العطر كمان للمرأة وكمان للرجل

الفعالية راح تكون لحد 12.11 فاذا كنتوا مسافرين في هاي الفترة اعملوا لفة في ديوتي فري واشتركوا بالفعالية, يمكن تربحو

رأيي في العطر: ريحة ناعمة ووردية, كتير انوثية وحلوة. مكونات الريحة هي مزيج من الفواكه ورائحة الياسمين, وزيت الجوري المعطر, وخشب الأرز. بتحسي الرائحة كتير منها ورد بالزبط متل ما انا بحب. بفكر ان هاد العطر مناسب اكتر للنهار ومش للسهرات او لليل لانه كتير ناعم وفرش, يعني مش تقيل

كمان تصميم العلبة كتير عجبني وهو مستوحى من “آرت ديكو” وتصاميم الكريستال اللي كمان بتدل على نعومة وانوثة برضو في الوانها الذهب الاحمر والزهري والابيض

اكتبولي في التعليقات اذا حبيتو العطر وكمان احكولي اذا كنتو بالديوتي فري وشاركتو بالفعالية، بحب اشوف الصور! بشوفكم في البوست الجاي

ياسمين