هاي دارلينجز
كيفكم اليوم؟ متل ما وعدتكم احكيلكم عن رايي وتجربتي مع غسالة
LG TWIN WASH
الجديدة اللي وصلتني قبل شهر تقريبا لحتى اجربها واحكيلكم عنها. معظمنا عايشين حياة مضغوطة بنحاول نلحق فيها قد ما نقدر ووقتنا قليل ومحدود، وغسالة توينواش الجديدة اجت لتحل عالقليلة مشكلة وحدة في وقتنا المحدود وتخفف علينا الوقت والمجهود اللي بنبذله في الغسيل (اكيد الفاشنيستات منكم واللي عندهم كتير اواعي بعرفو عن شو بحكي) ;) هههه
مجبورة احكيلكم اني كتير مكيفة على هاي الغسالة! لانها بالفعل بتغير كل الطرق اللي عرفناها لحد اليوم. واكيد بالنسبة الي الحفاظ على الملابس مش اقل اهمية من انه نعرف ننسقهم ونعمل ستايلينج، لانه لما الملابس مظهرها حلو ومرتب كل اللوك تبعنا بكون مرتب. مين منا ما خربت اواعي كتير غالية ع قلبها بسبب طريقة غسيل مش صحيحة او جودة غسيل مش منيحة؟؟ انا شخصيا كنت اعاني من غسيل القطع الناعمة والملابس الداخلية اللي بدها بس غسيل على الايد، واذا حطيتها بالغسالة بتخرب وخسارة عليها
وفي هاد الموضوع الغسالة الجديدة من إل جي حلتلي المشكلة! لانه فيها وحدة غسيل صغيرة اللي فيها برامج مناسبة للملابس الناعمة، ولانها صغيرة بكفي تحطي فيها كم قطعة وتشغليها يعني فش لزوم تعبيها، البرامج هاي مناسبة كمان للملابس الداخلية والقطع الصغيرة اللي بدها عناية خاصة، وكمان اذا بدك تغسلي بس ٣-٤ قطع وبدكيش تشغلي كل الغسالة
وطبعا احدى الامور اللي بتميز هاي الغسالة انه فيها وحدتين غسيل، الكبيرة والصغيرة، والتنتين ممكن يشتغلو مع بعض ويوفرو علينا كتير وقت غسيل، وبرضو الوحدة الكبيرة بتشتغل نشافة بالاضافة لانها غسالة، وفيها برنامج غسيل وتنشيف يعني ملابسك بتطلع ناشفة وجاهزة دغري بعد الغسيل! كتير مريح صح؟ بدل ما تنقلي الغسيل للنشافة او تنشريه بنفسك للتنشيف. من البرامج اللي كتير حبيتها في الغسالة هي التنظيف بالبخار (بدون مي) وكمان انها الغسالة بتقضي على ٩٩.٩٩٪ من المواد المثيرة للحساسية
وكمان من الاشياء اللي عنجد مميزة ومتقدمة في هاي الغسالة انه ممكن تنزلي عليها برامج خاصة وجديدة وممكن تتشغل من السمارتفون! يعني تكنولوجيا متطورة لآبعد الدرجات. باختصار، بنصح فيها كتير وعنجد مبسوطة منها
الغسالة باستيراد “بريماج” وممكن تشتروها في محلات الكهرباء متل تركلين حشمال، آل ام وغيرها، والسعر الموصى فيه للمستهلك ١١،٩٠٠ شيكل
بعرف السعر ممكن يكون شوي غالي بس فكروا انه بتحصلو بهاد السعر على ٣ ماكنات في ماكنة وحدة: غسالة ونشافة وغسالة صغيرة. فبالنهاية بطلع السعر معقول
احكولي اذا جربتوها او اذا عندكم اسئلة في التعليقات
بشوفكم في الپوست الجاي
ياسمين
