شركة إتش اند إم كتير بتعمل مجموعات مشتركة مع دور ازياء كبيرة ورائدة عالمياً متل بالمين, وألكساندر وانغ, وجيفانشي, وايزابيل مارانت, وجيمي تشو وغيرهم كتير اسماء كبيرة في عالم الازياء. وهاي السنة تشاركت اتش اند ام مع احدى دور الازياء اللي بحبها كتير وهي كنزو, فطبعاً كنت مجبورة أحصل على كم قطعة. مجموعة كنزو لاتش اند ام مستوحاة من الأدغال بالوانها واشكالها. تصاميم كنزو المعروفة بقصات مع ميول اسيوي وحبها للالوان الحيوية وتوجه الماكسيماليزم (بعكس المينيماليزم), وطبعاً كتير من القطع بتحمل شكل النمر اللي هو رمز لكنزو. هاي الاربع قطع اللي اخترتها من المجموعة, كل وحدة منها مميزة وممكن تلتبس بكتير طرق, متل البلوزة مع اكمام كبيرة اللي تصميمها مستوحى من قصة الكيمونو والوانها من الوان النباتات والحيوانات في الادغال, ممكن تلتبس مع جينز او تنورة او حتى بلوزة كم طويل مع قبة غولف وقت السقعة, وهيك بنخلق منها مظهر طبقات. وجاكيت بومبر الفرو مع تطريز النمر في الظهر اللي هو كتيييير كنزو ستايل, وقصة البومبر من الصرعات البارزة لفصل الشتاء اللي جاي علينا. وطبعا ما تنازلت عن التيشيرت اللي هي كتير كول وقطة اساسية ممكن تستخدم بكتير طلات

القطعة الاخيرة اللي هي الجرزاية الملونة, اخترتها من مجموعة كنزو للرجال ومش من مجموعة النساء, وهون بحب اعطيكو نصيحة وهي انه ممكن نفكر خارج النطاق المألوف ونلاقي قطع اللي بنحبها وبتناسبنا حتى لو ما كانت “مخصصة النا”, وخاصة لانه اليوم احنا عم بنشوف تلاشي الحدود الجندرية في عالم الازياء وهاد الاشي كتير منيح لحتى كل واحد وواحدة يختارو الاشي المناسب الهم ويكونو خلاقين ومبدعين واهم اشي احرار في الاختيار بدون تقييد

:)ممكن تشوفو المجموعة الكاملة هون, ويا ريت تشاركوني بالقطع اللي حبيتوها بالتعليقات

 ما تنسو تتابعوني على الانستغرام والفيسبوك لتعرفو الاخبار والمشاريع المقبلة